انتشرت فى الفتره الأخيره كلمة ريادة الأعمال بشكل كبير ، للدرجه اللى اصبح اى شخص حابب يفتح اى مشروع بيقول علي نفسه انه رائد اعمال ، بس يعنى ايه رائد اعمال ؟و يعني إيه ريادة أعمال من الأساس ؟ وايه الشروط اللي لازم تكون موجوده فى اى مشروع عشان يطلق عليه مشروع رائد؟ و ايه الفرق بين المشروع الرائد والمشروع الصغير ؟
كل دى اسئله اختلطت فى أذهان الشباب للدرجة التي أصبح فيها مصطلح ريادة الأعمال مجرد موضة ، زيه زى اى حاجه تانيه ، وأصبح مسمى رائد أعمال مجرد مدعاة للتفاخر بين كثير من الشباب اللى مش فاهم يعنى ريادة أعمال من الأساس وواخد الموضوع مجرد بريستيج فقط.
عشان كده فى مقالنا ده ح نجاوب مع بعض على الاسئله اللى فوق دى عشان نقدر نفهم يعني إيه ريادة أعمال صح
اولا ريادة الأعمال معناها تطبيق فكرة ( جديدة )تساعد فى حل مشاكل الناس أو تضيف لهم قيمه ، يعنى ايه الكلام ده ؟ يعنى بمنتهى البساطه انك تفكر فى حل بره الصندوق والحلول التقليدية انك تحل مشكلة لناس ، زى مثلا اوبر لما طبقت كانت بتحل أهم مشاكل عند اللى بيركبوا تاكسيات ، الرجاله حلت لهم مشكلة الأجرة المغالى فيها من طرف السائقين لانك بتبقى عارف المشوار يتكلف كام قبل ما تركب ، والبنات حلت لهم مشكلة الامان لانه معروف هى ركبت منين والساعه كام وفى عربيه نوعها ايه و مين الكابتن ، فإذن فكره أوبر حلت مشكلة عند بعض الناس بشكل جديد و مبتكر بالإضافة انها ساهمت فى زيادة الدخل عند بعض الناس اللى شغلوا سيارتهم اما من خلال سائقين – وفرت فرص عمل – اون لاين خلالهم هم انفسهم.
طب ودا ايه الفرق بينه وبين المشروع الصغير ؟
بص يا سيدى المشروع الصغير هو عبارة عن مشروع ناس عملته قبل كدا و نجح معهم فأنت بتقلده مش اكتر زى مثلا سوبر ماركت او محل البان او موقع تجارة الكترونية او مشروع حلويات ، يعنى من النهايه هو نموذج عمل تم تطبيقه من قبل واتعرف أرباحه قد ايه و خسايره و فرصه ومشاكله وانت مجرد بتنفذه فى منطقتك هو هو بالظبط ، اه ممكن تزود اضافه او اثنان ولكن أساس فكرته طبقت من قبل … وضحت كده ؟
عشان كدا مش كل مشروع يتفتح يبقى مشروع ريادى ، لا فى مشاريع كثيرة جدا تحملت الى مشاريع صغيره ، يعنى لو حد الان عمل ابلكيشن مثلا للشراء اون لاين هنلاقى ان امازون سوق وجوميا ونون سبقوه في النموذج عنده هو فقط يطبق نفس النموذج ده مش اكتر.
ده معناه ان رياده الأعمال تتحمل مخاطر أكبر من المشاريع الصغيرة ؟
ايوة طبعا لان رائد الأعمال لسه مش عارف فكرته هتنجح ولا حتفشل ، هل يقدر يعوض خسارته ولا يحقق مكاسب كبيرة ، عشان كدا مكاسب رياده الأعمال لما بتحقق بتكون كبيره جدا وكذلك خسارتها بتكون كبيره جدا ، عشان كدا لو عايز تكون رائد اعمال لازم تكون مغامر ومخاطر بشكل كبير ، اما لو بتدور على الربح المضمون فأنا انصحك تفتح مشروع صغير بتكون مخاطرة اقل ولكن كما ربحيته اقل وفى النهايه دا بيكون قرارك الشخصى ، هل هتقدر تتحمل المخاطرة ولا لا.
ولذلك تكون نسبة النجاح فى المشاريع الريادية طبقا للإحصائيات لا تزيد عن 3% حتى فى الدول المتقدمة .. طب ليه ؟ لأسباب كثيرة ولكن من ضمنها أن نسبة المخاطرة فيها عالية فكثير يعزفون عنها ولكن من ينجح فيها يحقق مكاسب كبيره مثل ايلون ماسك اللى حقق مكاسب كبيرة من اختراعه PayPal أول بنك الكترونى على الانترنت استطاع يحصل من خلال على تمويل Fund تم استثمارهم فيه وكذلك شركة Tesla للسيارات الكهربائية و Space X للفضاء ، لذلك رائد الاعمال لازم يكون واسع الأفق و يبص لبره ويشوف الصوره بشكل اكبر واوسع وعنده رؤية لما سوف يحدث فى المستقبل.
وفى النهايه مش عيب انك تفتح مشروع صغير ولكن العيب انك ماتعرفش قدراتك وامكانياتك صح للدرجه اللى تورطك و تخسرك فلوسك ، ومش مهم نوع مشروعك ايه المهم تكون ناجح فيه.